يعيش جمعة حرا ً مستقلا

يعيش جمعة حرا ً مستقلا

نايم على شط بحيرة كبيرة وجميلة
والجو جمــــــيل و الخضرة حواليا من كل ناحية
وفى ايدى كوباية عصير مانجو ( حلوة مانجو دى ) ... وفى ايدى التانية ماسك دبوس فرخة انما ايه ..
و لسه بقربه ناحية بقى عشان انسفه

فجأة
الاقى الواد سيد بيخبطنى على كتفى واحنا فى المحاضرة
قلت له حاضر يا سيد هديك حتة من الفرخة
قالى فرخة ايه يا بنى ... قوم يا جمعة قوم بسرعة الدكتور جاى على هنا
قمت مفزوع وعنيا حمرا .. لقيت الدكتور قدامى وبيقولى انت ياطالب انا كنت بقول ايه دلوقتى ؟؟
تهتهت شوية كده فى الكلام وقلت له مش عارف .. قالى مش عارف !! بقولك قول انا كنت بقول ايه
قلت له والله ما اعرف .. قالى وكمان بتحلف .. بقولك قوووول احسنلك
قلت له يا دكتور والله لو اعرف هاقول علطول .. انا هخبى عليك ليه يعنى
قالى طب اتفضل بره كمل نوم فى بيتكم ولما تيجى المحاضرة تجى مركز .. اتفضل

خرجت من المدرج مزاجى زى الزفت قلت اروح اسنكح شوية على ما العيال اصحابى يخرجوا من المحاضرة
قعدت اظبط فى نفسى شوية والمع فى الشوز الأخضر بتاعى وحسست على شعرى لقيت التسريحة الفرزاتشى باظت من نومة المدرج
قلت اروح اظبطها فى الحمام وانا فى طريقى للحمام لقيت واحد ماشى ورايا لابس اسود فى اسود ونضارة سودا وكاب اسود
انا بينى وبينكم اتخضيت بقى .. قلت اكيد عيلته كلها ماتت فى الدويقة ولا حاجة ولا يمكن كانوا فى المطافى بتاعت المسرح القومى
بصراحة شكله صعب اوى ..قلت اقف لغاية ما يعدى لقيته وقف .
. قلت اغير اتجاهى واروح الحمام اللى فى الدور الرابع
لقيته طالع ورايا السلم .. قلت اتوه وانزل تانى نزل ورايا ..
عملت نفسى واقف فى الطابور الكبير بتاع العيش قصدى قصدى بتاع الكتب لقيت الراجل وقف ورايا

انا اترعبت قمت طالع اجرى على الحمام لقيته بيجرى ورايا .. جيت ادخل الحمام وبقفل الباب
لقيت الواد ده عايز يدخل معايا .. قلت له لأ لحد هنا وكفاية ..هو ايه مفيش ادب .انت معندكش اخوات صبيان ولا ايه ..
هو انا اول واحد اطرد من المحاضرة يعنى ولا عشان انا شكلى طيب وغلبان تعمل فيا كده
والله العظيم انا مليش دعوة باى حاجة هنا فى الكلية وماشى جوه الحيط والكتب رخيصة وانا بحب الريس
وخد بالك ان انا ممكن اعيط دلوقتى حالا .. اه ولا هيهمنى اى حد

كل الكلام ده قلته وهو واقف يبصلى من فوق لتحت وقالى تمام هو ده المطلوب بالظبط
وقام باصص لى وقايلى : جمعة يا بنى انت من الاحرار
قلت له .. ياراااااجل .. قالى اسمع بس انت هتقوم بدور وطنى عظيم
مصر اختارتك عشان تقوم بمهمة صعبة .. وتكون امين اتحاد الكلية السنادى
قلت له ومصر عارفانى منين .. قالى يابنى انت فيك كل المواصفات اللى احنا عايزنها قصدى مصر عايزاها
قلت له بس انا مدفعتش المصاريف لسه .. قالى ولا يهمك مصر تدفعهالك .. قلت له وكمان مليش نشاط فى الكلية
قالى يابنى مصر تعملك نشاط .. قلت له ومليش شعبية كمان ..
قالى مصر تعملك شعبية قلت له طب ممكن تخلى مصر تقنع ابويا عشان ميعمليش مشاكل قالى وماله يابنى
قلت له طب والانتخابات بتاعت الاتحاد امتى
قالى وانت مالك ومال الانتخابات يا ضنايا .. انت هتنجح فى الاخر غصب عن عين اى حد
قلت له والمطلوب منى ايه ... قالى ولا حاجة ملكش دعوة بالانتخابات خالص انت كده كده ناجح بس هتمضيلى هنا
على الورقة الصغيرة دى .. بصيت فى الورقة يمين وشمال لقيتها بيضا خالص
قلت له ورقة ايه دى يا مصر .. قصدى يا كابتن
قالى ده مجرد تعبير عن وفاءك لمصر .. عشان لو فكرت تلعب بديلك مصر من الاتحاد هتشيلك

فكرت شوية قلت له وانا هستفاد ايه يعنى قالى يوه يوه يوه يوووه حاجات كتيييير ..
شهرة وفلوس ورحلات وبنات ومزاج يعنى ده غير يعنى ان نتيجتك هتظبط فى اخر السنة .. اول ما قالى موضوع النتيجة ده ..
علطول قلت له وانا تحت امر مصر .. مضيت الورقة .. قام مطلع من جيبه 100 جنيه وحاططها فى ايدى و قالى مصر
بتسلم عليك وبتقولك دلع نفسك وابقى هات برفان عشان رحيتك تقرف
وقام ماشى من قدامى واختفى فى ثوانى فى وسط الزحمة

تانى يوم وانا داخل من على البوابة قبل ما اطلع الكارنيه لقيت الحرس بيقولوا جمعة بيه اتفضل يا فندم
داخل المدرج متاخر لقيت نفس الدكتور بيقولى جمعة ازيك يا حبيبى .. جاى متاخر ليه
اقعد استريح هنا وقام رافع ايده وهوووب ضارب واد من اللى فى الصف الاول على افاه وقاله قوم لعمك جمعة يا (@#!#$@$ )
قعدت وانا مندهش وفى سرى بقول : بركاتك يا مصر

بعد المحاضرة لقيت زحمة عند رعاية الطلبة وعرفت ان الترشيح للاتحاد بدأ
.. لقيت يجى 6 بلطجية واقفين وهات يا شتيمة فى الناس اللى واقفة ومفيش اى حد عارف يترشح ولا يقدم ولا يعمل حاجة .. شوية وبدأ الضرب بالاحزمة .. لقيت كام واحد من زمايلى بيضربوا يا عينى والبلطجية مبهدلينهم .. انا طبعا اتنرفزت ورحت له .. مسكت ولد من البلطجية قلت له عيب كده يا حضرت
احنا فى جامعة مش فى قهوة .. اصدر صوتا غليظا مكعبلا عرفت بعدها انه بيقولى ( وانت تطلع مين يا أمور ) قلت له انا جمعة احم امين اتحاد الكلية وممكن اوديك فى داهية دلوقتى .. لقيت حاجة كبيرة كده خبطتنى على وشى
.. ووقعتنى على الارض عرفت برضه بعدها ان دى ايده

قمت من الوقعة لقيت الراجل الاسود فى اسود واقف فى جمب .. رحت له قلت له شفت اللى حصل انا اضربت من البلطجية .. دى قلة ادب .. هما ليه بيمنعوا الناس انها تترشح .. مفيش حرية .. مفيش نزاهة .. مفيش شفافية
بص لى باندهاش وقالى ثوانى .. وقام مشاور بايده كده لقيت 3 بنى ادمين حجم عائلى جم وقفوا جمبه .. قلت له ربنا يخليك. الف شكر .. استنى بقى لما اشاور لهم على الواد اللى ضربنى عشان يخدوا لى حقى .. قالى لا دول عشانك انت .. نزاهة وحرية وشفافية ( اسماء التلات رجالة ) .. كيفوه يا رجالة
ضربونى ضرررررب .. وانا قاعد انادى يا مصر الحقينى يا مصر .. قام الراجل مقطع الورقة اللى كنت ماضى عليها وقالى خلى الحرية تنفعك

قعدت اعيــــــــط فى جمب .. على حال الجامعة و اقول مفيش فايدة مفيش امل مفيش فايدة
وانا فى حالة انهيار تام .. فضلت كده لحد ما جه واحد ابن حلال قالى قوم يا جمعة قوم يا جمعة
خلاص الاتحاد الحر هيتعمل .. الاتحاد الحر هيتعمل

قمت فرحان وقلته بجد ؟... قالى اه خلاص ومفيش شطب ولا ضرب ولا منع .. واعمل دعاية براحتك و
و لو نجحت هتبقى بتمثل صوت الطلبة بجد .. يلا يا بطل ابدأ حملة دعايتك

ناديت للواد سيد وخميس اصحابى شالونى على اكتافهم وبدأت اطوف فى الكلية بتاعتى وانا قاعد اهتف

((((يحيا الاتحاد الحر ... يسقط الاتحاد المر ))))
(((( الاتحاد الحر ........ يعيش يعيش يعيـش ))))

بدأت الطلبة تكتر فى المسيرة بتاعتى وبدأوا يهتفوا لى

(( يعيش جمعة حرا مستقلا ))
(( يعيش جمعة حرا مستقلا ))
(( يعيش جمعة حرا مستقلا ))







جمعة الحر

---

duda [lum pvh W lsjrgh